شعور سخيف(هشام الجخ)

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف ...

سألوا جحا عن سر ضحكه

قال : أصل اتنين وشبكو

اللى كان من تحت ميت

واللى كان من فوق كفيف

دا شعور سخيف....

وشعور سخيف

إنك تكون رمز الشحاتة

تبني مبنى للشحاتة

تعمل وزراة للشحاتة

يا ساقية دوري ... عدي فوقي ودوسي

نصبوا عليا وشحتوني فلوسي

ربطوني فيكي .. حتى ما اتغميت

هما اللى فرحوا ووحدي أنا اتغميت

أنا اللى صاحب البيت

عايش بدون لازمة

ولما مرة شكيت

إدونى بالجزمة ....

مش لاقي تطفح أديك ...!!؟؟

هاتولنا وجيبولنا وإدونا ودونا

هنجيب منين نديك ...!!؟؟

مش لاقي تطفح أديك ...!!؟؟

طافح يابلدي غدايا .. ولوعتى غدايا

وآدي الأحبة ألتقوا وإتجمعوا عدايا

أنا اللى زارعك دهب

بتأكلينى سباخ ..!!

مان كان ده تقل ودلع

بزيادة دلعك باخ

لا شفت فيكى هنا

ولا شفت فيكى ترف

كل اللى فيكى قرف

كرامتنا متهانة

واللقمة بإهانة

بتخلفينا ليه لما انتي كارهانا ...!!؟؟

يعني ايه تبقى إنتى هبة النيل يا مصر

وكل يوم المية تقطع ...!!؟؟

يعني ايه لما اشتكي غلو الفاتورة

يقولو تشكي بس تدفع ....

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما عٍلمك ما يلاقيش يآكل فيطفش

يعني ايه نرفع ايدينا بالسلام لجل الغزاة ...!!؟؟

ويعني ايه لما ابقى ماشي فى حالي اتشد اشتباه ...!!؟؟

يعني ايه لما اتحبس أربع سنين حبس احتياطي ...!!؟؟

حبس إعتباطي ....!!!

يعني ايه مش حاسة بالعمر وغلاوته ...!!؟؟

بتصبي مر العمر ليه

ده انا كنت ح اوهب لك حلاوته

أنا عمري ما أتأمرت

ولا حطيت شروطي

ومكان ما ترسي مركبك

بابنى شطوطي

أنا كنت جيشك لما مماليكك باعوكي

وكنت يوسف لما عشتى سنين عجاف

وضلوعىي دىي اللي فى معركة قادش حموكي

وشفايفي دىي اللي ما بطلتش فى يوم هتاف

دة انا كل شبر فى أرضك اتمرمغت فيه

وكل يوم عشتيه

أنا اتعذبت بيه

بتكرهيني عيونك السودا وأيامي اللي فاتت

ما انتيش حبيبتى من النهاردة

حبيبتي ماتت

مع صوت أدانك جرس

فى الشدة صاحينلك

من امتى كانوا الحرس

هما اللى باقينلك ...!!؟؟

بعتيني علشانهم

وعنيكي معصوبة

ياهل ترى خاينة ...!!؟؟

ولا زيي مغصوبة ...!!؟؟

كل الكلام اتقال

والشعر بقى ماسخ

والصبر علو جبال

والظلم شئ راسخ

وطن وغرقان فى النطاعة

كل شئ ريحته نطاعة

علمونا بالعصاية

ورضعونا الخوف رضاعة

علمونا فى المدارس

يعني ايه كلمة قيام

علمونا نخاف من الناظر

فيتمنع الكلام

علمونا ازاي نخاف

وازاي نكش

بس نسيوا يعلمونا الاحترام

فمتزعلوش

لما ابقى مش باسمع كلامكم

وماتزعلوش لما ابقى خارج عن النظام ..

مستنى ايه من طفل ربوه بالزعاق

غير المشاكل والخناق ...!!؟؟

كل اللي بيقولك بحبك دول نفاق

أنا لما قلت لك بحبك

كان نفاق ..

الحب يعني اتنين بيدوا

مش ايد بتبني وستميت(600 ) تيت تيت يهدوا ..

الحب حالة

الحب مش شعر وقوالة

الحب يعني براح فى قلب العاشقين للمعشوقين

يعني الغلابة يناموا فى الليل دفيانين

الحب يعني جواب لكل المسجونين

هما ليه بقوا مسجونين ..

يعني أعيش علشان هدف

علشان رسالة

يعنى احس بقيمتي فيكى

إني مش عايش عوالة

يعني لما اعرق تكافئيى بعدالة

الحب حالة

الحب مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

الحب جواكي .. إستحالة ..

بقلم هشام الجخ

قصيده جميله جدا تسلم ايدك

مرورك الاجمل يا توته